Тэмдэглэлийн дэвтэрт бичсэн зүйл энд хүрээд дуусав.
«Шоронд үнэхээр зомби вирус дэгдсэн бололтой.»
«Гэхдээ энэ сэжүүр арай дэндүү ил тод биш үү? Галт зэвсгийн өрөөний сейфийн нууц код нь зүүн тийш 6, баруун тийш 2, зүүн тийш 11…»
Фан Хэн аяархан бувтнав.
«Надаар сейфийг нь хайлгах гээд байгаа хэрэг үү?»
«Ийм ил тод сэжүүр… урхи биш биз?»
Фан Хэн хэдэн хуудас цааш нь эргүүлэв.
Тэмдэглэлийн хамгийн сүүлчийн хуудсанд бас нэгэн бичээс байлаа.
Бичгийн хэв маш замбараагүй бөгөөд яаран сандран бичсэн нь илт.
«Уучлаарай!
Уучлаарай!
Би үнэхээр их айсан! Биеэ захирч чадахаа больсон. Тэр үед би зөвхөн зугтахыг л хүссэн…
Бүх зүйл миний буруу!
Бурхан минь! Би чухам ямар тэнэг зүйл хийчихэв ээ!!
Би зоорийн хаалгыг гаднаас нь түгжээд тэднийг бүгдийг нь дотор нь хорьчихсон!
Би хулчгар амьтан! Найз нөхөд, хамт ажиллагсдынхаа үхэлд хүргэсэн хэрэггүй амьтан!
…
Бүлгийн ахлагчийн зөв байжээ. Энэ бол үймээн самуун биш, халдварт өвчин юм!
3-р байрыг халдвар авч галзуурсан хүмүүс гаднаас нь бүсэлчихсэн тул би ч бас гарч чадахгүй боллоо…
Ганц гарц нь зоорь боловч түүнийг мангас эзэлчихсэн.
Хэрэв хэн нэгэн энэ бичгийг олбол дараагийн хүмүүст хэлээрэй. Зооринд мангас бий. Би зоорийн орцны түлхүүрийг сейфэнд нуучихна.
Зоорийн хаалгыг дур мэдэн огт бүү онгойлго!
Уучлаарай, бүлгийн ахлагч аа. Би удахгүй та нартайгаа нийлнэ…»
Дараагийн агшинд Фан Хэний даалгаврын бүртгэл дээр тоглоомын хэд хэдэн мэдэгдэл дараалан гарч ирэв.
【Мэдэгдэл: Та уншиж дуусгалаа】
【Мэдэгдэл: Та «Цагдаагийн алба хаагчийн тэмдэглэл» нууц даалгаврыг идэвхжүүллээ】
Даалгаврын нэр: Цагдаагийн алба хаагчийн тэмдэглэл.
Даалгаврын тайлбар: Зоорийн орцны түлхүүрийг ол.
Даалгаврын хүндрэлийн зэрэг: ???
Даалгаврын шагнал: Амьд үлдэх оноо.
Нэмэлт тайлбар: Даалгаврыг хэдий чинээ хурдан гүйцээнэ, төдий чинээ их шагнал авна.
Бичгийг уншиж дуусаад Фан Хэн хэсэг чимээгүй болов.
Тэгэхээр энэ шоронгийн харгалзагч амиа аврахын тулд хамтрагчдаа зомбинуудтай хамт зооринд амьдаар нь түгжчихсэн хэрэг үү?
Ццц…
Ийм арчаагүй хамтрагч л хамгийн аюултай даа.
Фан Хэн дотроо санаа алдан бодов.
Тоглоомын үед бас нууц даалгавар идэвхжиж болдог. Ерөнхийдөө нууц даалгаврын шагнал нэлээд өндөр байдаг.
Фан Хэн Тоглоомын бүртгэлийг дахин нээгээд нэг гүйлгэж харж, даалгаврын эрсдэлийг үнэлэхийг оролдов.
Зомби нар шоронгийн ажлын хэсгийн 1, 2-р давхрын хайгуулыг дуусгаад, 3-р давхрыг цэвэрлэж яваа байв.
2-р давхарт аюул бага.
Үнэлгээ дууслаа.
Фан Хэн товчхон дүгнэв.
Олох ашиг нь эрсдэлээс хавьгүй их.
Энэ даалгаврыг авъя!
Даалгаврыг авахаар шийдсэн тул Фан Хэн хамгийн өндөр шагналыг авахын төлөө цаг алдалгүй дуусгахаар яарав.
Фан Хэн галын голомтоо унтраагаад босож, толгойгоо өргөн хана руу харав.
Орох танхимын хананд шоронгийн ерөнхий зохион байгуулалтын зураг наалттай байлаа.
«Тэмдэглэлд сейф галт зэвсгийн өрөөнд байгаа гэж бичсэн…»
Фан Хэн зураг дээрээс галт зэвсгийн өрөөний байршлыг хайв.
Оллоо. Хоёрдугаар давхрын хамгийн сүүлчийн өрөө.
Фан Хэн үүргэвчнээсээ өргөст бороохой гаргаж, таван зомби хуулбарыг дуудаад дагуулан, танхимын урд талын шатаар 2-р давхарт гарав.
Автоматаар ажиллуулахаар явуулсан зомби хуулбарууд зам тандах, юм цуглуулах, дайсантай тулалдах ажлыг зэрэг хийж чадна.
Харамсалтай нь, тэдний оюун ухаан дутмаг байв. Онгойлгож чадахгүй хаалгатай таарвал хаалгыг нүдэж хүчээр орохын оронд тойрч явдаг.
Түгжээтэй эдгээр өрөөнд зомби болон нөөц зүйлс нуугдсан байх ч боломжтой.
Уг нь Фан Хэн «сюрприз хайрцаг»-аа маргааш Ляо Буфаньд задлуулахаар хадгалж үлдээхээр төлөвлөж байв.
Галт зэвсгийн өрөөний үүдэнд.
Фан Хэн хаалганы бариулыг зөөлөн эргүүлж үзэв.
Үнэхээр ч галт зэвсгийн өрөөг дотроос нь түгжсэн байлаа.
Фан Хэн чихээ модон хаалганд наан доторх чимээг чагнав.
Зомбины дуу сонсогдож байлаа. Бас чамгүй олон байв.
Фан Хэн гараа даллан, ард байсан зомби хуулбарууддаа хаалгыг нүдэж эвдэхийг дохив.
Гуравхан минутын дараа хаалга нүдүүлсээр эвдэрч унав.
Хэдэн зомби ганхан дайвалзсаар өрөөний гадна зогсож байсан Фан Хэн рүү алхаж ирэв.
«Шур! Шур!» Үүдийг хаан зогссон зомби хуулбарууд хэдийн бэлэн байв. Тэд урт жадаараа зомбинуудыг дахин дахин ухрааж, биеийг нь хэд хэдэн газар нэвт сүлбэв.
Ингэж хэдэн арван удаа давтсаны эцэст өрөөнд үлдсэн зомби нар ч цэвэрлэгдэв.
Фан Хэн галт зэвсгийн өрөөнд орж, доторхыг шалгав.
Өрөөний байдал гаднахтай адил замбараагүй, яг л дээрэмдүүлсэн мэт байлаа.
Тавиур дээрх галт зэвсгүүд аль хэдийн алга болж, энд тэнд үлдсэн хэдхэн сум л хоцорчээ.
Сум ч бас сайн олз. Ховор нөөцөд тооцогдоно.
Фан Хэн сумнуудыг нэг бүрчлэн Тоглогчийн үүргэвчиндээ хийв.
【Мэдэгдэл: Та ердийн гар бууны сум*237 олж авлаа】
Тэмдэглэлийн дэвтэрт дүрсэлсэн хуучны ногоон сейф галт зэвсгийн өрөөний баруун талын буланд байрлаж, нүдэнд шууд тусаж байлаа.
«Зүүн тийш 6, баруун тийш 2, зүүн тийш 11…»
Фан Хэн сейфний өмнө очоод, тоон хүрдийг болгоомжтой эргүүлэв.
«Чаг».
Сейф үл мэдэг чаг хийн дуугараад онгойв.
Фан Хэн сейфийг татан нээлээ.
Сейфэнд нэг гар буу, нэг түлхүүрийн багц чимээгүйхэн хэвтэж байлаа.
«Үнэхээр буу байна!»
Фан Хэний нүд нь гялалзаад гар бууг шүүрэн авав.
Эд зүйл: Гар буу—Кольт M4000.
Тайлбар: Сайжруулсан Кольт M4000 загварын гар буу. 12 сумны багтаамжтай. Критик цохилт өгөх магадлалыг бага зэрэг нэмэгдүүлнэ.
Ямар сайхан эд вэ!
Сөнөлийн дараах ертөнцөд галт зэвсэг гэдэг үнэхээр хэрэгтэй зүйл. Тоглогчдын дунд үнэ цэн нь маш өндөр, ялангуяа аюултай эхний үед тоглогчдод хамгийн их заналхийлдэг!
Фан Хэн энэ бууг өндөр үнээр авах хүн гарцаагүй олдоно гэдэгт итгэлтэй байв.
Энэ түлхүүрийн багц ч байна.
Фан Хэн түлхүүрийн багцыг гартаа авч жигнэж үзэв.
3-р байрны ажлын хэсгийн бүх түлхүүр энд байгаа бололтой.
Ингэвэл маргааш хаалга бүрийг нэг нэгээр нь нүдэж эвдэх шаардлагагүй.
Фан Хэн түлхүүрийн багцыг хураахад тоглоомын мэдэгдэл дахин гарч ирэв.
【Мэдэгдэл: Та зоорийн орцны түлхүүрийг оллоо】
【Мэдэгдэл: Та «Цагдаагийн алба хаагчийн тэмдэглэл» даалгаврыг гүйцэтгэж, амьд үлдэх 15 оноо авлаа】
【Мэдэгдэл: Та дараах сонголтуудаас сонгож болно:】
【Нэгдүгээр сонголт: Зоорийг судалж үзэхийг оролдох】
【Хоёрдугаар сонголт: Түлхүүрийг дурын Сүйрлийн худалдаачинд зарж, амьд үлдэх 100 оноо авах】
«Энэ даалгавар нэг л хачин юм.»
Фан Хэн даалгаврын мэдэгдлийг ажиглан бодов.
«Даалгаварт сонголт өгсөн атлаа яг одоо сонголтоо хий гэж шаардаагүй байна.»
Хэсэг бодсоны эцэст Фан Хэн эхлээд зоорийг үзэхээр шийдэв.
Тэр шоронг Хоргодох байр болгон тохижуулахаар төлөвлөж байгаа.
Хэрэв зооринд бөөн зомби цуглачихсан байвал шөнө яаж тайван унтаж чадах билээ?
Фан Хэн зомби хуулбаруудаа дагуулан, ирсэн замаараа 1-р давхарт буцаж очив.
Зоорийн хонгил руу орох орц баруун талын агуулахын хажууд, нүднээс далдхан байрлаж байлаа.
Бүр гадна талд нь гурван давхар төмөр хаалга суурилуулсан байв.
«Хамгаалалтын арга хэмжээ нь арай дэндүү сайн юм биш үү?»
Фан Хэн ийн бувтнан, багц түлхүүрээ нэг нэгээр нь үзэж, тохирох түлхүүрийг хайв.
Тэр түлхүүр бүрийг яаралгүй тэмдэглэсээр, эцэст нь хамгийн сүүлчийн хаалгыг онгойлгов.
Хаалганы цаана урт коридор үргэлжилнэ.
Гэрэл нь ер бусын бүдэг, коридорт энд тэнд хатаж ширгэсэн цусны толбууд харагдана.
Хоёр зомби урд нь зам тандаж, Фан Хэн араас нь аажуухан дагав.
Арав гаруй алхмын дараа Фан Хэн гэнэт үл мэдэг чимээ сонсов.
Ямар чимээ вэ!
Фан Хэн алхмаа зогсоов.
«Чар чар…»
Анхааралтай чагнавал, ямар нэгэн зүйл ханыг үрж байгаа мэт сонсогдоно.
Чимээ улам ойртсоор байлаа.
Фан Хэний хүүхэн хараа үл ялиг агшив.
«Баларлаа!»
Нөхцөл байдал хэчнээн ноцтойг ухаарсан Фан Хэн хараал урсган эргэж зугтав.
Хувирмал зомби—Аалз!
Маш хурдан мөлхөх чадвартай зомби! Хөдөлгөөний хурд асар өндөр бөгөөд ямар ч гадаргуугаар авирч чадна! Тоглогчдын босгосон Хоргодох байрыг сэтлэн нэвтрэхдээ гаргууд.
Тэд ямар ч завсраар хоргодох байр руу мөлхөн орж, таныг Бодит ертөнцөөс хүчээр тоглоом руу буцаан татна!
Ханаар байнга мөлхдөг бөгөөд хувирлын дараа хоёр гар, хоёр хөл нь ер бусын урт болсон тул тоглогчид тэднийг бас «аалзан зомби» гэж нэрлэдэг!