Лун Чэнь гартаа барьсан хаш савыг ажиглав. Дотор нь шингэн бөмбөлөг байх агаад түүнээс хүчтэй дулаан ялгарч байлаа.
Гэвч Лун Чэнь тэр бүлээн шингэн бөмбөлөг бол араатны гал гэдгийг мэдэж байв. Энэ нь Шидэт араатны галын мөн чанар байлаа.
Араатны гал туйлын үнэтэй зүйл. Нэг араатны гал нь тухайн Шидэт араатны амьтай дүйцэх бөгөөд зөвхөн хоёрдугаар зэрэг болон түүнээс дээших Шидэт араатнууд л араатны галыг тэтгэх чадвартай байдаг.
Лун Чэнь тэнгэрлэг мэдрэхүйгээрээ араатны галыг шинжлэв. Доторх галын энерги нь туйлын нягт байлаа. Лун Чэний дурсамжид тулгуурлавал энэ араатны гал хоёрдугаар зэрэглэлийн оргилд хүрсэн Шидэт араатнаас гарсан бололтой. Вэй Цан араатны галыг гардуулан өгөхдөө царай нь яагаад тийм их барайсныг гайхах зүйлгүй.
Үрэл нэрэх гал нь бүх биеийг нь бүрхэн тархав. Лун Чэнь хаш савыг нээгээд, араатны галын мөн чанарын бөмбөлгийг залгив.
ДҮЛ!
Лун Чэнь залгимагц усан бөмбөлөг мэт байсан араатны галын анхны төрх өөрчлөгдөв. Туулай мэт номхон байсан араатны гал гэнэт зэрлэгшиж, догшин ширүүн болов.
Араатны гал бол Шидэт араатны амийн мөн чанар байлаа. Түүнд Шидэт араатны догшин шинж агуулагддаг тул жирийн үрэлч араатны галыг хүчээр номхруулахын тулд догшин хүсэл зоригийг нь бага багаар мохоох хэрэгтэй бөгөөд үүнд асар их цаг хугацаа шаардагдана.
Тэрхүү догшин хүсэл зоригийг мохоосны дараа л Үрэл нэрэх галаа араатны галтай нэгтгэж, эсэргүүцлээ аажмаар орхиход нь хүргэн, алхам алхмаар нэрж чадна.
Гэвч Лун Чэнь бусдаас өөр байлаа. Өнөөдрийн тулаан түүнд байсан бүх далд хөзрийг ил болгосон. Амь насаа хамгаалахын тулд түүнд илүү хүчтэй хөзрүүд хэрэгтэй байв.
Ся Чанфэн хамгийн итгэлт туслахаа, Вэй Цан араатны галаа алдсан байлаа. Тэд үүнийг зүгээр өнгөрөөхгүй гэдгийг тэнэг хүн ч мэднэ.
Эзэнт улсын нийслэлд Лун Чэнь зөвхөн Их мастер Юнь Чид найдаж чадах байв. Гэвч тэр Үрэлчдийн холбооны тэргүүн учраас улсын тэмцэлд шууд оролцож чадахгүй.
Лун Чэнь өөрийгөө бүхэлд нь холбоонд даатгаж, эзэнт улсын хэрэгт дахин оролцохоо болихгүй л бол Юнь Чи юу ч хийж чадахгүй. Гэвч ийм олон жил дарлагдсаныхаа дараа сүүдэрт нуугдсан хорон санаатныг олж тогтоохоо Лун Чэнь яаж орхиж чадах билээ?
Тэр Чү Яог яаж орхиж чадах билээ? Чү Яо ч бас ийм гашуун зовлон туулсан нь Лун Чэньд өөрийнх нь зовлонг сануулж байв. Чү Яогийн эсрэг сэмхэн хуйвалдсан хүн нь түүний Сүнслэг язгуурыг хулгайлсан хүн мөн биш гэж үү?
Бүх зүйл тодорхой болохоос өмнө Лун Чэнь түүнийг ч, өөрийнхөө өш хонзонг ч орхиж чадахгүй. Энэ үзэн ядалтыг зүгээр залгиад өнгөрч чадахгүй байлаа. Тиймээс түүнд цаг маш давчуу байсан бөгөөд араатны галыг нэрэхийн тулд хамгийн ширүүн, шууд аргыг хэрэглэхээс өөр аргагүй байв.
ДҮЛ!
Лун Чэний биеийн дотроос дахин нэг дэлбэрэх чимээ гарлаа. Араатны гал ходоодонд нь ормогцоо догшин ирвэсний толгойн хэлбэрт орж, бүх хүчээрээ тэмцэж эхлэв. Аймшигтай өндөр хэм Лун Чэнийг түлж үнс болгохыг хүсэж байгаа мэт байлаа.
Араатны галыг гарган авсны дараа түүнийг дарж болдоггүй. Эс тэгвээс хүч нь суларч, чанар нь муудна.
Лун Чэнь одоо хоёрдугаар зэрэглэлийн оргилд хүрсэн Шидэт араатны галд шаруулж байгаа мэт байв. Догшин энерги нь түүнийг цус нулимахад хүргэлээ.
Тэр цус амнаас нь гармагцаа уур болон хувирч байв. Лун Чэний бие аль хэдийн дүрэлзсэн зуух мэт болсон байлаа.
—Хм! Өчүүхэн хоёрдугаар зэргийн Шидэт араатан ч надтай тэмцэж зүрхэлж байна уу?
Лун Чэнь хамраараа хүйтэн инээж, Фэнфү одноо идэвхжүүлэв. Долоон хуй салхи нь галзууран эргэлдэж, бүх биеийнх нь галын энерги аварга тор мэтээр араатны галын бөмбөлгийг хүчээр бүрхэв.
Араатны гал хамгийн догшин байдалдаа орсон ч хүч нь тийм их биш байсан Үрэл нэрэх гал Фэнфү од болон томорсон долоон хуй салхины дэмжлэгээр туйлын бат бөх, хүчирхэг болжээ.
Эхэндээ араатны гал ийш тийшээ дүүлэн давхиж байсан ч хэдхэн амьсгалын төдийд баригдсан араатан мэт болов. Хэчнээн тэмцсэн ч нэмэр болсонгүй.
Эцсийн эцэст тэр бөмбөлөгт цаашид өөрийг нь дэмжих энерги үлдээгүй байв. Лун Чэнь бүх хүчээрээ нэрэхэд догшин аура нь аажмаар элэгдэж, гал нь тайвширч эхлэв.
Лун Чэнь ийм үр дүн гарна гэдгийг урьдчилан тооцоолсон байсан ч сэтгэл нь сая нэг тайвшрав. Тэр одоо хөлсөөр бүрхэгдэж, хувцас нь нэвт норсон байлаа.
Түүний зан чанар хоёр хуваагдсан мэт санагдав. Өөрийнх нь нэг тал араатны галыг басамжилж байхад нөгөө тал нь үүнийг үнэхээр их хүсэж байлаа. Нэг тал нь баярлаж, нөгөө тал нь жигшиж байв.
Лун Чэнь гашуунаар инээв. Тэр Үрлийн бурхны сүнстэй нэгдсэн учраас Үрлийн бурхан ийм араатны галыг дорд үзэх нь аргагүй байлаа.
Гэвч энэ гал түүнд нэн хэрэгтэй байв. Араатны гал бол Үрэл бясалгалын замын эхний алхам юм.
Лун Чэнь тасралтгүй нэрсээр байтал араатны гал бүрэн тайвширч, усан бөмбөлөг мэт болов. Одоо тэр туйлын номхон болсон бөгөөд догшин аурагийн өчүүхэн ч ул мөргүй бүрэн цэвэршжээ.
Жирийн үрэлчийн анхны гал нь үнэндээ Даньтянь дахь сүнслэг хийг тодорхой замаар урсган, гадна талд өндөр хэмтэй хий болгон гаргаснаар бий болдог.
Ийм гал нь үнэн хэрэгтээ халуун хийн нэг хэлбэр юм. Энэ хийг үүсгэж чаддаг хүмүүс л үрэлч болох авьяастай байдаг.
Мянган хүн тутмын нэгээс ч цөөн хүн үүнийг хийж чаддаг тул үрэлчид туйлын ховор. Гэвч зарим хүн төрөлхийн онцгой Даньтяньтай бөгөөд дотроо галын энергийн өчүүхэн ул мөр агуулсан байдаг. Үүнийг бясалгаснаар Үрэл нэрэх гал болгон өтгөрүүлж чадна. Ийм гал л жинхэнэ Үрэл нэрэх гал юм.
Гэвч ийм хүмүүс мянганд нэг биш, саяд ч хүрэхгүй цөөн байдаг. Тиймээс үрэлчдийн ихэнх нь Лун Чэньтэй адил бөгөөд огцом хүчирхэгжихийн тулд араатны галыг эхлэл болгон нэрэх шаардлагатай болдог.
Гэсэн ч араатны гал туйлын үнэтэй бөгөөд үнийг нь хэдхэн алтан зоосоор хэмжих аргагүй. Галт шувууны нутаг даяар магадгүй зөвхөн Юнь Чи л араатны галтай байж болох юм.
Лун Чэнь галаа аажмаар биедээ хураан, бие дотор нь номхорсон араатны галын бөмбөлгийг ажиглахдаа өөрийн эрхгүй бага зэрэг эвгүйцэв.
Ихэнх үрэлч араатны галыг нэрж дуусмагцаа Даньтяньдаа нэгтгээд, араатны галыг өөрсдийн цорын ганц бясалгалын зам болгодог.
Гэвч Лун Чэнь ингэж чадахгүй. Юуны өмнө түүний сүнслэг хийн гол эх үүсвэр нь Даньтянь бус, Фэнфү од байлаа.
Түүнээс гадна тэр Есөн Одот Ноёрхогч Биеийн урлагийг бясалгаддаг бөгөөд энэ урлаг туйлын нууцлаг, хүчирхэг. Энэ нь түүнд өөрөөсөө хэд хэдэн бясалгалын шат дээгүүрх хүмүүстэй тулалдах боломж олгодог. Хэн нэгэн түүнийг зодож алсан ч тэр энэ урлагаа орхиж, зөвхөн Үрэл бясалгалыг дагахааргүй байв.
—Оллоо!
Лун Чэнь гэнэт нэг санаа олж, араатны галыг Даньтяньдаа байрлуулаад, долоон хуй салхиараа аажмаар бүрхэв.
—Туршаад үзье.
Тэр гүнзгий амьсгаа авч, маш зоригтой туршилтаа эхлүүлэв. Долоон хуйгаа ашиглан араатны галыг аажмаар шингээж эхэллээ.
Араатны гал шингээлтийг огт эсэргүүцсэнгүй. Лун Чэний тушаалыг даган уусан задарч, бүх биеэр нь тархсан меридиануудад орлоо.
Үүнийг гал нэгтгэх гэдэг. Араатны галыг уусган задалж, бүх биеэр тараах үйл явц юм. Ингэснээр галыг хамгийн сайн мэдэрч, таньж мэдэх боломжтой.
Араатны гал аль хэдийн бүрэн цэвэршсэн байсан тул энэ үйл явц туйлын амархан өрнөв. Ингээд араатны гал түүний меридиануудаар тархлаа.
Энэ аргыг өмнө нь хэн ч хэрэглэж байгаагүй нь гарцаагүй. Түүнд байсан Үрлийн бурхны дурсамжид ч ийм зүйлийн талаар огт дурдагдаагүй байв.
Араатны галыг меридиануудаараа тараасны дараа Лун Чэнь баяртайгаар мэдэв. Түүний меридиануудын өргөн үнэхээр хэдэн сантиметрээр нэмэгдсэн байлаа.
Тэр хэдхэн сантиметрийг яавч дутуу үнэлж болохгүй. Меридиан бүр сувагтай адил. Суваг хэдий чинээ өргөн байна, тулалдааны үеэр төдий чинээ их сүнслэг хий дамжуулж, илүү их хүчийг тэсрүүлэн гаргаж чадна.
Даньтянь нь далай, харин меридианууд нь суваг гэж бодож болно. Тулалдааны үеэр далайн усыг сувгуудаар дамжуулан урсгаж, дараа нь буцаан нэгтгэх хэрэгтэй. Тулааны техник ийм их тэсрэх хүчтэй болдог нь ч үүнтэй холбоотой.
Гэвч Тулааны техник хэдий чинээ хүчирхэг байна, төдий чинээ их энерги шаарддаг. Хэрэв сувгуудын багтаамж хүрэлцэхгүй бол тэд хагарна. Дайснаа огт гэмтээж амжилгүй, өөрийн меридианууд задран сүйрнэ.
Лун Чэнь Тэнгэр Цуулахыг мэддэг ч одоо хүртэл гаргаж ашиглаж чадаагүйн учир нь энэ байлаа. Түүний меридианууд хангалттай өргөн биш байв.
Өнөөдрийн туршилт нь түүнийг баярласандаа үсрэхэд хүргэх шахав. Одоо тэр өөрийн меридиануудыг араатны галыг тэтгэх дамжуулагч болгон ашиглаж, хоёуланг нь харилцан дэмжүүлж байлаа.
Тэр бясалган хүчирхэгжихийн хэрээр араатны гал меридиануудыг нь байнга тэлэх болно. Лун Чэнь энэ удаа үнэхээр ашиг хүртжээ.
Бусад үрэлч араатны галыг Даньтяньдаа нэгтгэснээр хурдан бясалгаж чадах байсан ч энэ нь меридиануудаа зузаатгаснаас олох ашигтай огт дүйцэхгүй.
—За, энэ бүхэн сайн уу, муу юу гэдгийг одоо ч шалгах хэрэгтэй.
Тэр гүнзгий амьсгаа авч, дотроо залбиран, меридиануудтай нь нэгтгэсэн араатны галыг аажмаар буцаан Даньтяньдаа хураав.
Түүний алганы төвд гал дүрэлзэн гарч ирэв. Цайвар улаан өнгөтэй бөгөөд гарч ирсэн даруйдаа орон зайг мушгин гажуудууллаа.
Лун Чэнь сэтгэл хангалуун толгой дохив. Дөнгөж нэрж цэвэршүүлснийхээ дараа ийм их хүчтэй болсон байлаа. Үнэхээр араатны гал байх нь аргагүй, анхны галаасаа хэд дахин хүчирхэг юм.
Тэр хэсэг эргэлзсэнээ эцэст нь шүдээ зуун, Фэнфү одноос өчүүхэн хэмжээний сүнслэг хийг долоон хуй салхи руугаа аажмаар урсгав.
Аажмаар эргэлдэж байсан долоон хуй салхи тэр даруй томорч, галзууран эргэлдэж эхлэв.
—Энэ бүтэх болов уу даа…
Лун Чэнь гартаа барьсан гал руу санаа зовнин ширтэв. Өөрийгөө сандарсангүй гэвэл худал болно.
Гэсэн ч тэр долоон хуй салхиныхаа энергийг тэдгээрийн голд өтгөрүүлсэн галын бөмбөлөг рүү илгээхээр шийдэв.
Лун Чэнь бие нь дэлбэрэх гэж байгаа мэт огцом доргихыг мэдрэв. Анх нэг фут урт байсан гар дахь дөл тэр даруй арван фут өндөр болон сунажээ.
—Баларлаа!
Сандарсан Лун Чэнь галаа яаран буцаан хураав.
Үрэл нэрэх гал нь тэсрэн оргиход ялгарсан аймшигт халуун дээврийг тэр дор нь түлж харлуулжээ.
Тэр гараа сэгсэрч, галыг унтраах салхи үүсгэв. Гал унтарсан ч бүх дээвэр тэр чигээрээ хийсэж одлоо.
Дээвэр нь тэр чигээрээ хийсэж, одод түгсэн тэнгэр 360 хэмээр харагдах болсныг харсан Лун Чэнь уйлмаар санагдав. Найзынхаа гэрт дөнгөж ирээд байшинг шатаагаагүй ч бүхэлд нь зад татчихлаа! Энэ ч сайнгүй байлаа…
Үүнийг дагаад хөлийн чимээ сонсогдож, Ши овгийнхон бүгд сандарч гүйлдэн ирэв. Өөр арга ч байсангүй, бүхэл бүтэн айл сэрчихсэн байлаа. Дүлий хүн ч сэрэхээр чимээ гарсан юм.
Лун Чэний эвгүйцсэн царайг харсан Ши Фэнгийн аав цочирсноо нууж инээмсэглэв. Лун Чэньтэй юу ч ярилгүй, өөрт нь шинэ өрөө бэлдэхийг нэг хүнд даалгав.
Лун Чэнь ямар нэг зүйл хэлэхийг хүссэн ч Ши Фэнгийн аав мөрөн дээр нь зөөлөн алгадаад инээн хэлэв.
—Чи Ши Фэнтэй ах дүүс шиг юм чинь энэ газрыг өөрийн гэр шигээ л үз.
Түүнд шинэ өрөө бэлдэж өгсний дараа Лун Чэнь ойлгоогүй өөр техникүүдийг туршихаас дахиж зүрхэлсэнгүй. Тэр орон дээр сууж, долоон хуй салхиараа тэнгэр, газрын сүнслэг хийг шингээн, Фэнфү од руугаа илгээж эхлэв.
Маргааш өглөө нар мандахаас өмнө Лун Чэний биеэс гэнэт дэлбэрэх мэт чимээ гарлаа.
Лун Чэнь баяртайгаар нүдээ аажмаар нээлээ. Хуан Чантай хийсэн тулааны дараа бясалгалын гацааг ийм хурдан давж, Хий Хураахын наймдугаар тэнгэрийн давхаргад хүрнэ гэж тэр огт төсөөлөөгүй байв.
Тэр өглөөний цайгаа уугаад Ши Фэнгийн биеийг үзэж шалгав. Ноцтой гэмтэлгүйг нь мэдээд түүнд хоёр эмийн үрэл үлдээв. Үүний дараа Лун Чэнь Ши овгийн гэрээс гарч, шууд Үрэлчдийн холбоог зорилоо.