Хар, туранхай өвгөн Жимми нүдээ онийлгон зомби руу сэрэмжтэй харж, арбалет дээрээ гараа тавив.
Зомби ганхсаар Фан Хэний өмнө ирээд, гадаа цуглуулсан материалаа нэг нэгээр нь шалан дээр тавилаа.
【Мэдэгдэл: Таны зомби материал цуглуулах нэг үеийг хугацаанаас нь өмнө дуусгалаа. Та түлээ мод2, жижиг чулуу7, өд4, шувууны өндөг2, хаягдал материал2, хуванцар1 авлаа】
Фан Хэн гараа даллан, зомби хуулбараа дараагийн ээлжийн хайгуулд автоматаар ажиллуулахаар гадагш явуулав.
«Энэ... энэ чинь...»
Ляо Буфань Фан Хэнд материал хүргэж ирсэн зомби руу алмайран харж, гайхсандаа үг хэлж чадахгүй байснаа нэлээд удсаны эцэст сулхан дуугаар:
«Энэ тоглоомыг ингэж ч бас тоглож болдог юм уу?» гэв.
«Чи юу яриад байгаа юм бэ? Энэ чинь наад захын үйлдэл.»
Фан Хэн ингэж хэлээд материалуудаа хурааж, хоёрхон шувууны өндөг үлдээн хамрынхаа өмнө ойртуулж үнэрлэв.
Өө, муудаагүй байна!
Энэ зомби хуулбар азтай байж, хайгуул хийж яваад шувууны үүр олжээ. Тэгээд дотроос нь хоол болгох хоёр өндөг ухаж гаргасан байв.
«Наад захын үйлдэл ч гэх шиг! Тэгвэл би яагаад чаддаггүй юм?»
Ляо Буфань сая л учрыг ойлгожээ. Фан Хэн хэлсэндээ буцчих вий гэж айсан тэрээр яаран:
«Тохирлоо, Фан Хэн. Сая ярьсан ёсоороо би бүх материалаа чамд өгөөд, нэг порц чанасан өндөг авна шүү.»
«Мэдээж.»
Фан Хэн Ляо Буфаний өмнө байсан бүх материалыг ганц хөдөлгөөнөөр үүргэвчиндээ хийв.
Ляо Буфаний цуглуулсан материалын ихэнх нь Фан Хэний сонирхлыг татсангүй. Харин хувьслын талстын нэг хэлтэрхий түүнд хэрэгтэй байлаа.
«Сайн байна, залуу минь. Чадварлаг юм. Чиний төрөлхийн чадвар энгийн биш бололтой, зэрэглэл нь лав өндөр байх даа» гэж Жимми магтав.
Зомби аюул учруулахгүйг мэдээд, Жимми зэвсгээ эртхэн хураачихсан байв.
«Энэ S зэрэглэлийн төрөлхийн чадвар.»
Фан Хэн нууж хаалгүй шууд хүлээн зөвшөөрөв.
«Гайхах зүйлгүй.»
Жимми инээмсэглэн толгой дохив. S зэрэглэлийн туслах төрөлхийн чадвартай хүнтэй нэг хоргодох байранд амьдарч байгаа болохоор түүнд бага ч гэсэн ашиг тус хүрнэ.
Харин Ляо Буфань урьдын адил Фан Хэний гарт байгаа хоёр өндөгнөөс нүд салгалгүй, шүлсээ гоожуулан яаруулж байлаа.
«Фан Хэн, элдвийг ярихаа больё. Төлбөрөө авчихсан юм чинь хурдан хийж өгөөч. Бид чинь юугаа хүлээгээд байгаа юм?»
«Чанасан өндөг хийхэд ус хэрэгтэй биз дээ?»
Лю Линь Фан Хэний төрөлхийн чадвар өөрийн төсөөлснөөс хавьгүй хүчтэйг ойлгожээ. Анхны гайхшрал нь намдмагц түүнтэй эвээ олох санаатай хэлэв:
«Надад ус байгаа. Чамд зээлж өгье» гэв.
«Хэрэггүй, хэрэггүй.»
Фан Хэн ингэж хэлээд дахиад хаалга руу харлаа.
Модон хаалганы гаднаас бас нэг зомби ганхсаар орж ирэв.
Тэр Фан Хэний өмнө очоод, өмнөх зомбийн адил үүргэвчнээсээ материалаа нэг нэгээр нь гаргаж тавилаа.
【Мэдэгдэл: Таны зомби материал цуглуулах нэг үеийг хугацаанаас нь өмнө дуусгалаа. Та түлээ мод7, жижиг чулуу2, голын усаар дүүргэсэн шилэн сав*2 авлаа】
Фан Хэн шилэн савыг гарган галын голомтон дээр тавьж халаан буцалгав.
Голын усыг шууд уувал сөрөг төлөв үүсэх магадлал өндөр. Харин буцалгасны дараа ингэж санаа зовох хэрэггүй.
Ляо Буфань ус буцлахыг догдлон харж, дотроо өөрийн эрхгүй ингэж бодов:
Фан Хэн ахын чадвар дэндүү төгс юм! Сүйрлийн дунд амьд үлдэхэд ёстой л тоглоомын чит ашиглачихсан юм шиг байна шүү!
Фан Хэн усыг буцалж болтол нь тайван хүлээгээд, өндөг тус бүрийг тус тусын шилэн саванд хагалан хийв.
【Мэдэгдэл: Та чанасан өндөг хийх ажлыг дуусгалаа. Та хоол хийх чадварыг ойлгон эзэмшлээ, чадварын туршлагын оноо+1】
Хоёр шил энгийн чанасан өндөг бэлэн боллоо!
«Пүү, халуун байна, халуун байна.»
Хоол бэлэн болмогц Ляо Буфань шилэн савыг яаран авч, амаа түлэхийг ч тоолгүй нэг том балгав.
Чанасан өндөг гэдэг чинь үнэхээр сайхан юм! Цангаа ч тайлагдана, гэдэс ч цадна!
Нэг чанасан өндөг идсэний дараа Ляо Буфаний цадалтын үзүүлэлт 15 оноогоор нэмэгдэж, цангаа нь ч ихэд тайлагдав.
Тэр галын голомтын өмнө суугаад Лю Линь рүү чимээгүйхэн харснаа, саяхан идсэн төмс нь нэг л амтгүй санагдахыг мэдрэв.
Яарч өөрийгөө ингэж хямд зарчихлаа. Ямар их гарз вэ!
Фан Хэн нэг аяга чанасан өндгөө шөлтэй нь яаралгүй идэж уув.
Харамсалтай нь, гэдэс дүүргэсэнгүй.
Лю Линь өмнө нь буруу хэлээгүй ажээ. Ойд хоол хүнс олох үнэхээр хэцүү байв. Хайгуулд явуулсан 10 зомбиноос ердөө 1 нь л хоол олсон байлаа.
Гэхдээ Фан Хэн яарсангүй. Эхний хайгуулын үе ч дуусаагүй байгаа. Хэд хэдэн удаа автоматаар ажиллуулчихвал гэдэс дүүргэх хоол, усны эх үүсвэр олоход асуудалгүй.
Ходоодоо бага зэрэг дүүргэсний дараа Фан Хэн өнөө шөнөдөө бэлдэж эхлэв.
Тоглоомын эхний үед нэг шөнийг тайван өнгөрөөхийн тулд хоргодох байрнаас гадна дулаан барих галын голомт, унтаж амрах энгийн ор хэрэгтэй.
Галын голомт бэлэн байгаа. Түлээ мод хангалттай байхад болно.
Энгийн ор хийхэд ч тун амархан байлаа.
Хамгийн энгийн түлээ модыг сүрэлтэй хослуулахад л болно.
Зомбийн сүйрлийн тоглоомд тоглогч энгийн ор хийж дуусгасны дараа л тоглоомоос гарахыг зөвшөөрдөг.
Тоглоомоос гарсан хугацаанд систем тоглогчийг унтаж байна гэж үзнэ. Ингэснээр эрч хүчний оноо хурдан сэргэж, цадалтын үзүүлэлт ч ердийн үеийнхээс удаан буурна.
Гэхдээ тоглогч тоглоомоос гарсан байх үед ор нь эвдэрвэл түүнийг бодит ертөнцөөс тэр даруй Дээд бурхны тоглоом руу татан оруулна. Үүнээс гадна түүнд сөрөг нөлөө үйлчилнэ.
【Мэдэгдэл: Та энгийн ор хийж дуусгалаа. Таны урлах суурь чадварын туршлагын оноо+1】
«Фан Хэн.»
«Аан?»
«Хэхэ.»
Ляо Буфань дөхөж ирээд ичингүйрэн толгойгоо маажив.
«Би ор хийхээ бүр мартчихжээ. Надад жаахан материал зээлээч, маргааш буцааж өгье.»
«Буцаах хэрэггүй ээ. Бэлэг гэж тооц.»
Фан Хэн дөнгөж хийж дуусгасан энгийн ороо Ляо Буфаньд өгчихөв.
Ор хийх материал дэндүү энгийн тул гадаа хаа сайгүй түүж болдог, огт үнэд хүрэхгүй байлаа.
«Хөөх, тэгвэл бүр ч эвгүй санагдлаа. Баярлалаа. Дараа хэрэг гарвал дуудаарай, заавал тусална.»
Ляо Буфань цээжээ дэлдэн, өөрийгөө найдаж болох хүн гэдгээ илэрхийлэв.
Галын голомтыг тойрон суусан хүмүүс өнөөдөр өдрийн олзоо эмхэлж цэгцлэнгээ, амьд үлдэхэд хэрэгтэй энгийн зүйлс хийж байлаа.
Фан Хэн эвшээж, бага зэрэг ядарснаа мэдрээд эхлээд тоглоомоос гарч унтаад авбал яасан юм гэж бодов.
Гэхдээ үүнээс өмнө нэг зүйл хийх ёстой. Шөнийн манаа.
Шөнө ээлжлэн манаа хийх нь маш чухал. Гаднах зомби орж ирж чадахгүй ч өөр тоглогчид энд нэвтэрвэл яах вэ?
«Тэгвэл шөнийн манааны хуваарь гаргая.»
Тэдний хэн нь ч шинэ тоглогч биш байв. Хэн ч эсэргүүцээгүй тул хар, туранхай өвгөн Жимми Фан Хэний саналыг дэмжин:
«Тэгвэл цагаа хуваарилъя. Шөнийн 12 цагаас өглөөний 8 цаг хүртэл хүн бүр хоёр цаг манаа хариуцна» гэв.
Тэд ярилцаад, Фан Хэн шөнийн 2-4 цагийн хооронд тоглоомд орж манаа хийхээр болов.
«За, бүгд 5 минутын өмнө тоглоомд ороорой.»
Өнөө шөнийн манааны хуваарийг тохирч дуусаад, Фан Хэн зомбинуудад материал хайж цуглуулах ажлыг тасралтгүй давтан гүйцэтгэх тушаал өгч, автоматаар ажиллуулав.
«Бүгдээрээ, би жаахан ядарлаа. Эхлээд тоглоомоос гаръя. Маргааш уулзъя.»
Фан Хэн бусдын хариуг ч хүлээлгүй түрүүлж энгийн орон дээрээ хэвтэв.
【Мэдэгдэл: Та тоглоомоос гарах гэж байна】
【Мэдэгдэл: Та өнөөдөр тоглоомд 7.9 цаг байж, нийт 30 цаг тоглоомоос гадуур байх эрх авлаа. Энэ хугацаа дуусахаас өмнө тоглоомдоо буцаж орно уу】
【Мэдэгдэл: Анхаарна уу, зарим тодорхой нөхцөлд Та тоглоом руу хүчээр татагдан орж болзошгүй】
Фан Хэн тоглоомоос гарна гэж хэлэнгүүтээ гарчихыг хараад, жижиг модон байшинд үлдсэн хэд бие бие рүүгээ гайхан харцгаав.
Тоглоомын эхэн үед ихэнх хүн тоглоом дотор аль болох удаан байхыг хичээдэг. Ингэвэл тоглоомоос гарсан хугацааг илүү их цуглуулж, Дээд бурхны тоглоомоос тогтоосон 30 хоногийн тоглох хугацааг эрт бүрдүүлж чадна.
Энэ залуу яахаараа тоглоомоос гарах гэж ингэж яарав?
Ляо Буфань Фан Хэний энгийн ор луу харан толгой сэгсэрч, аяархан хэлэв.
«Мундагчууд ч ёстой дураараа юм даа.»