Онлайн тулаанчид

6-р анги

6-р анги — Зарц

Сонсох

“Эрэл хайгуул хэр явагдаж байна? Энэ тоглогч Юүаны талаар ямар нэгэн мэдээлэл олсон уу?” гэж нэгэн царайлаг залуу орон дээрээ суун, Онлайн тулаанчдын тоглоомын төхөөрөмж болох дуулгыг толгойдоо зүүсэн хэвээр, хаалганы дэргэд зогсох дунд эргэм насны эрийг ширтэн асуулаа.

“Уучлаарай, залуу эзэн. Гэхдээ энэ тоглогч өөрийнхөө хэн болохыг нууцлахаар шийдсэн бололтой. Бидний санал ч түүнийг гаргаж чадсангүй” гэж дунд эргэм насны эр ядарсан өнгөөр хариулав. Тэр Юүаны талаар мэдээлэл хайхын тулд сүүлийн хоёр өдөр огт унтаагүй ч үр дүн нь юу ч үгүй хоосон урам хугаралт байлаа.

“Өгөөшинд орохгүй байна гэж үү? Тэгвэл бидний хийх ёстой зүйл бол өгөөшийг нь улам томруулах. Яваад шагналыг хорин сая болгож өөрчил. Энэ тоглогч аль хэдийн хэт баян биш л бол эрт орой хэзээ нэгэн цагт өгөөшинд заавал орно” гэж залуу хорин сая гэдэг түүнд юу ч биш мэт тайван хэлэв.

“Ойлголоо.”

Ингээд дунд эргэм насны эр залууг ганцааранг нь үлдээн гарч одов.

“Ямар ч үнээр хамаагүй би энэ тоглогчийг гартаа оруулна. Энэ хүн бол Азын хатагтайн хүүхэд юм уу, эсвэл тоглоомыг бүтээгчидтэй холбоотой нэгэн байх. Тиймээс жирийн хүмүүсийн олж авах ямар ч боломжгүй зүйлсийг тоглоом дотроос олж авч чаддаг байна. Хэрэв би түүнийг өөрийн бүлэглэлд элсүүлж чадвал манай гэр бүлийн зэрэг дэв дэх байр суурь гарцаагүй дээшилнэ!”

Дэлхий даяар үүнтэй төстэй дүр зураг өрнөж байлаа. Нэр нөлөө бүхий олон хүн тоглоом дотроо аль хэдийн бусдаасаа гэрлийн жилээр түрүүлчихсэн энэ тоглогч Юүаны талаар илүү ихийг мэдэхийн тулд чадлынхаа хэрээр бүхнийг хийж байв. Гэвч Юүан хэдхэн системийн зарлалаас болж бодит ертөнцөд ямар их үймээн дэгдээснээ огт мэдээгүй хэвээр байлаа. Юүаны хувьд Онлайн тулаанчид зүгээр л нэг тоглоом байсан ч бусдын хувьд тийм биш байв. Тэд өөр өөрийн далд зорилготой байлаа.

Өглөөний цайгаа уусныхаа дараа Юүан тоглоомд орсон ч Шиао Хүагийн жижигхэн бие хаана ч харагдсангүй.

‘Тэр ингэж орой болтол гадуур байсныхаа төлөө гэрийнхэнтэйгээ асуудалд орчихсон юм болов уу?’ гэж тэр бодов. ‘Магадгүй гэрийнхэн нь санаа зовохгүй байгаа гэж худал хэлээд, биднийг жаахан удаан тоглуулахыг хүссэн юм болов уу…’

Юүан хөгжилтэй бяцхан охиныг санан санаа алдав. Түүнгүйгээр энэ ертөнцөд өөр юу хийх билээ? Хүч чадал, эд хөрөнгө, нэр алдар—Юүан эдгээрийн аль нь ч сонирхдоггүй байв. Түүний хүсэж байсан цорын ганц зүйл бол хөгжилдөж, бодит ертөнцөд хийж чаддаггүй зүйл болох биеэ хэвийн ашиглах явдал байлаа.

Тэр Шиао Хүаг явахаасаа өмнө өгсөн хүзүүний зүүлтийг гаргаж ирэв. Толгой сэгсрэн, санаа алдаад,

“Би ингэж тэвчээргүй байж болохгүй. Тэр намайг эргэж ирэхийг хүлээсэн шиг би ч бас түүнийг хүлээнэ” гэв.

Ингээд тэр дахин суун бясалгаж эхлэв. Эхэндээ уйтгартай байсан ч аажмаар бясалгалд дасахын хэрээр түүнд таатай санагдаж эхлэв. Энэ нь нойрсож байхдаа иллэг хийлгэж байгаа мэт байлаа.

Цаг хугацаа хурдан өнгөрч, шөнийн тэнгэр дахин үзэгдэв.

160,000/160,000

«Түвшин ахихад хангалттай Ци шингээж авлаа»

«Та Сүнслэг Шавийн 6-р түвшинд хүрлээ»

«Бүх үзүүлэлт +350»

320,000/320,000

«Түвшин ахихад хангалттай Ци шингээж авлаа»

«Та Сүнслэг Шавийн 7-р түвшинд хүрлээ»

«Та Сайжруулсан Мэдрэхүйг сурлаа»

«Бүх үзүүлэлт +400»

—

«Сайжруулсан Мэдрэхүй»

«Зэрэглэл: Хамаарахгүй»

«Тайлбар: Боломжтой бүх мэдрэхүйн үйл ажиллагааг байнга сайжруулна. Идэвхжүүлэх шаардлагагүй.»

—

320,295/640,000

“Дараагийн түвшин рүү ахихад улам их хугацаа шаардагдаж байна. Шаардлагатай хэмжээ нь түвшин бүрээр хоёр дахин нэмэгддэг юм байна. Дахиад хэдэн түвшин байгаа бол?” гэж Юүан бодов. Гэвч өөрийгөө одоо ч Сүнслэг Шавь хэвээр гэдгээ мэдэхээр хожуу үеийнхээ талаар санаа нь зовж байлаа. “Энэ хурдаараа явбал сүүл үе шатанд нэг түвшин ахихын тулд бүтэн сар тасралтгүй бясалгах хэрэгтэй болох нь! Энэ бясалгал гэдэг чинь ёстой яршигтай юм…”

Юүан өнөө орой тоглоомоос гарах гэж байтал тэнгэрт нэгэн зарлал гарч ирэн, доороос тоо томшгүй олон харцыг өөртөө татав.

«Баяр хүргэе! Тоглогч Цагаан Лянхуа зарцтай болсон дэлхийн анхны тоглогч боллоо!»

Юүан Цагаан Лянхуа ямар төрлийн зарц олж авсан бол гэж гайхаж байлаа. Харин бусад бүх хүн дэлхийд дахин нэг цочрол өгөх хүн нь Тоглогч Юүан байна гэж бодож байсан ч зарлал дээр ‘Тоглогч Юүан’ биш, ‘Тоглогч Цагаан Лянхуа’ гэж гарсныг хараад гайхав. Мэдээж, олон тоглогч Юүан дэлхий дээрх цорын ганц ‘Өвөг’ байхаа больсонд тайвширчээ.

‘Өвөг’ гэдэг нь Юүаны анхны зарлалаас хойш системд ‘дэлхийн анхны’ болсон хүмүүсийг нэрлэхийн тулд тоглогчдын нийгэмлэгээс бий болгосон цол байлаа.

“Зарцууд гэнэ ээ.” Юүан гэнэт өөрөө ч бас зарцтай болохыг хүсэв. Гэхдээ хүн яаж зарцтай болдог юм бол?

Тоглоомоос гарсны дараа Юүаны хажууд оройн хоол барьсан Юү Рөү аль хэдийн зогсож байлаа.

“Юү Рөү, энэ тоглоомд яаж зарцтай болдог юм бэ?” гэж тэр түүнээс асахаар шийдэв.

“Зарц уу? Хэн нэгэн аль хэдийн зарцтай болсон юм уу?” гэж тэр сониучирхан асуулаа. “Бас би зарцтай болох талаар юу ч мэдэхгүй.”

“Цагаан Лянхуа гэдэг хүн.”

“Цагаан Лянхуа!” Юү Рөү тэр нэрийг шууд танив. “Тэр одоогоор Сүнслэг Шавийн 5-р түвшний бясалгалын түвшинтэй, шилдэг тоглогчдын нэг. Түүнээс гадна бодит амьдрал дээрээ ч баян айлын охин.”

“Сүнслэг Шавийн 5-р түвшин шилдэгт тооцогддог юм уу?” гэж аль хэдийн Сүнслэг Шавийн 7-р түвшинд хүрсэн Юүан гайхан асуулаа. Өөрөөс нь бүтэн хоёр түвшнээр хоцорч яваа хүн шилдэгт тооцогддог гэж сонсох нь түүнд хачин санагдав.

‘Тэд үнэхээр шилдэг тоглогчид юм гэж үү? Би бараг бясалгал ч хийлгүй байж, шилдэг чансаатай тоглогчдын нэгээс хоёр түвшнээр түрүүлчихсэн байна!’ гэж тэр бодов.

“Юү Рөү, одоогоор тоглоомд хамгийн өндөр бясалгалын түвшинтэй хүн хэн бэ?”

“Аянгын Эзэн Хаан гэдэг хүн гэж би бодож байна. Тэр Сүнслэг Шавийн 6-р түвшинд хүрсэн.”

“Хөөх, ямар сүржин нэр вэ…”

“Чиний санаа зовж байгаа зүйл чинь энэ үү?” гэж Юү Рөү инээв. “Харин чиний бясалгалын түвшин одоо хэд вэ? Чи ихэнх цагаа тоглож наргисан болохоор нэлээд доогуур байгаа байх, тийм үү? Таая… чи Сүнслэг Шавийн 2-р түвшин.”

Юүан инээмсэглэн,

“Буруу!” гэв.

“Сүнслэг Шавийн 1-р түвшин?”

“Дахиад буруу.”

“Юу вэ… Байзаарай… чи бясалгал ч хийж амжаагүй юм биш биз?!”

“Би чиний нүдэнд хэзээнээс ийм өрөвдмөөр, сул дорой болчихов оо? Ах нь гомдлоо…” гэж Юүан гунигтай дуугаар хэлэв. “Аан, яах вэ дээ. Би чинь ер нь тоглоом дотор хэн ч биш юм байна. Чиний хэлснээр би тоглож наргисаар байсан юм чинь надтай хурдан хамт тоглоод, хамтдаа юм хийе.”

“Энэ долоо хоногт боломжгүй. Би одоо ч сургуультай байгаа. Харин ирэх долоо хоногт зуны амралт эхлэхээр заавал тоглоно.”

“Сургууль гэж дээ. Атаархаж байна” гэж Юүан гашуунаар инээмсэглэв.

“Сургуульд явахад атаархах зүйл огт байхгүй ээ, ах аа. Уйтгартай, бас ядаргаатай” гэж Юү Рөү санаа алдав.

‘Гэхдээ би чамд болон тэнд байгаа бүх сурагчдад атаархсаар л байна…’ гэж тэр дотроо санаа алдав.

Хэдэн минут нэмж ярилцсаны дараа Юү Рөү унтахаар өрөөндөө буцаж орлоо. Юүан ч мөн адил унтахаар болов.

“Тэр маргааш хүртэл гарч ирэхгүй бол тэр зүүлтийг ашиглах хэрэгтэй…” гэж тэр унтахаасаа өмнө өөртөө хэлэв.

6-р анги дууслаа

Алдаа мэдэгдэх

Онлайн тулаанчид6-р анги · Унших

Алдааны мэдээлэл илгээхийн тулд бүртгэлээрээ нэвтэрнэ үү.

Нэвтрэх
ӨмнөхДараах