Чү Фэн Чү овогт ихээхэн гавьяа байгуулсан тул Чү Юаньба түүнийг хөгжүүлэхэд анхаарлаа төвлөрүүлэхээр шийджээ. Чү овгийн бүх хүн энэ тухай мэдэж байсан учир Чү Фэнд хандах тэдний хандлага ч мөн өөрчлөгдөв.
Хөх Лууны Сургууль руу буцах замд өмнө нь Чү Фэнд дайсагнаж байсан хүмүүс түүнтэй өөрсдөө санаачлан ойртож эхлэв. Гэвч Чү Юэгээс бусадтай харьцахдаа Чү Фэний хандлага халуун ч биш, хүйтэн ч биш байлаа.
Чү Фэн, Чү Юэ хоёр хамтдаа тоглоом шоглоом хийж, наргиж цэнгэн, хөгжилтэй байхыг харсан олон хүн Чү Юэд эцэс төгсгөлгүй атаархаж байв. Үүний зэрэгцээ тэд Чү Фэнд өмнө нь гаргасан хандлагадаа харамсаж байлаа.
Тэдний гэдэс хүртэл ногоортол харамссан ч энэ хорвоод харамслыг арилгах эм байдаггүй тул зөвхөн харамсахаас өөр аргагүй байв.
—Чү Юэ, ямар нэгэн зүйл хэрэг болбол намайг заавал хайж олоорой. Миний суудаг газрыг чи мэднэ.
Хөх Лууны Сургуульд ирснийхээ дараа Чү Фэн зөвхөн Чү Юэтэй салах ёс гүйцэтгээд, бусдын сэтгэл санааг огтхон ч тоосонгүй. Тэгээд бардамхан алхсаар явж одов.
Чү Вэй Чү Фэний холдон одох нурууг ширтэхдээ нүүрний хувирал нь ихэд ээдрээтэй байлаа. Тэр Чү Фэнд,
—Чү Фэн, Чү Эвсэлд нэгдээч. Хэрэв хүсвэл эвслийн тэргүүний суудлыг ч авч болно шүү дээ, гэж хэлэхийг үнэхээр хүсэж байв.
Гэвч ингэж хэлэх нүүр түүнд байгаагүй тул хэлж чадсангүй. Түүнчлэн ингэж хэлсэн ч Чү Фэн эвсэлд нь орохгүй гэдгийг тэр мэдэж байлаа.
Тэр өөрөө хүртэл Чү Эвсэл Чү Фэнд зохихгүй гэж бодож байв. Сүнсний шатны 7-р түвшний хүнийг ялж чаддаг Чү Фэн бүхэл дотоод хүрээнд ч лав онцгой нэгэн гэж тооцогдох байлаа.
Чү Фэн шууд суудаг газартаа буцсангүй. Тэр дотоод хүрээний Даалгавар Сонгох Газарт ирэв.
Дотоод хүрээний шавь нарын зав чөлөө нэлээд байдаг ч Хөх Лууны Сургууль их хэмжээний бясалгалын нөөцөөр хангаж чаддаг тул олон хүн дуртайяа сургуульдаа үлдэн бясалгадаг байлаа.
Жил бүр болдог Сүнсний Эмийн Ангаас гадна бясалгалын нөөц олж авах цорын ганц зам нь энэхүү Даалгавар Сонгох Газар гэж хэлж болохоор байв.
Нэрнээсээ л ойлгомжтой. Даалгавар Сонгох Газар гэдэг нь төрөл бүрийн даалгаврыг сонгон авч, гүйцэтгэсний дараа зохих шагналыг авах газар байлаа.
Хөнгөн даалгавар ч байсан, илүү ноцтой даалгавар ч байв. Хөнгөн даалгаварт бусдад эд зүйл олж өгөх, цувааг хамгаалан хүргэх зэрэг зүйлс багтана. Харин илүү ноцтой даалгаварт мангас алах, тулалдаанд туслах зэрэг зүйлс орно. Даалгаврын шагнал нь мэдээж тухайн даалгаврын төвөгтэй байдлаас хамаарна.
—Яагаад энэ бүх даалгавар ийм энгийн байдаг байна аа?
Чү Фэн Даалгавар Сонгох Газрын гол танхимд зогсон, нэг гараараа эрүүгээ түшээд, даалгаврын самбарт өлгөсөн пайзуудыг нааш цааш харж байлаа. Гэвч нэлээд удтал хайсан ч өөрт нь таалагдах нэг ч даалгавар олсонгүй.
Түүний биед Тэнгэрлэг Аянга оршдог байсан тул Чү Фэн бясалгалын түвшнээ ахиулахыг хүсвэл шаардлагатай сүнсний эрчим улам бүр ихэснэ. Энэ нь хэдхэн Гэгээн Сүнсний Өвс байхад шийдэгдэх зүйл биш байлаа.
Тиймээс Чү Фэн одоогийн зорилгоо Сүнсний Сувд олж авахад чиглүүлсэн байв. Гэвч бүхэл бүтэн даалгаврын самбарыг шалгасан ч хамгийн өндөр шагналтай даалгавар нь хэдхэн Гэгээн Сүнсний Өвс байлаа.
Сүнсний Сувдны тухайд бүр бодох ч хэрэггүй байв.
—Аан… жижиг зүйлсийг бага багаар цуглуулж байгаад ихийг бүтээхээс өөр аргагүй бололтой.
Ингэж бодсон Чү Фэн галзуу шийдвэр гаргав. Тэр гараа нэг сэгсрээд, шагнал нь Гэгээн Сүнсний Өвс байдаг өндөр төвөгтэй бүх даалгаврын пайзыг самбараас шүүрэн авч, гартаа хураав.
—Хараал ид, тэр хүү юу хийгээд байна? Галзуу юм биш үү?
—Тэр гай тарих гэж ирээгүй биз?
Чү Фэний үйлдэл олны анхаарлыг гарцаагүй татлаа. Тэдний бодлоор Чү Фэний насыг бодоход тэр хамгийн ихдээ Сүнсний шатны 4-р түвшинд л хүрсэн байх ёстой байв. Харин өндөр төвөгтэй даалгаврыг биелүүлэхийн тулд дор хаяж Сүнсний шатны 6-р түвшин шаардлагатай бөгөөд энэ нь Чү Фэний хийж чадах зүйл биш байлаа.
Тиймээс Чү Фэн галзуураагүй л бол зориуд гай тарих гэж байна гэж бүгд бодов.
Гэвч өндөр төвөгтэй даалгавар цөөн байсан тул Чү Фэн Гэгээн Сүнсний Өвсөөр шагнадаг бүх даалгаврыг авсныхаа дараа харцаа дунд төвөгтэй даалгаврууд руу шилжүүлэв.
Чү Фэн өндөр төвөгтэй даалгаврын пайзуудыг галзуу мэтээр авч байгаа нь тэдний анхаарлыг л татаж байлаа. Харин дунд төвөгтэй даалгаврын пайз руу гараа сунгавал тэдний дургүйцлийг төрүүлэх байв.
—Хөөе! Чи юу хийгээд байна? Чамд асуудал байна уу?
Гэнэт хэн нэгэн чангаар хашхирлаа.
Чү Фэн хөмсгөө зангидан, түүн рүү хашхирсан хүн рүү харав. Тэгээд тэр хүн өөрийнх нь танил болохыг олж мэдлээ. Тэр Чү Фэнтэй нэгэн зэрэг дотоод хүрээний шавийн шалгалтад орсон бөгөөд хүмүүс ихээхэн өндрөөр үнэлдэг байсан Дуань Юйшуань байлаа.
Одоогийн Дуань Юйшуаний царай тун барайсан байв. Тэр нэлээд удаан шаргуу хайсны эцэст өөрт нь таалагдсан нэг даалгаврыг арай гэж олсон байтал Чү Фэн шууд аваад явчихсан юм.
Хэрэв Чү Фэн тэр даалгаврыг үнэхээр авахыг хүссэн бол асуудалгүй байлаа. Гэвч Чү Фэн үүнийг хүсээгүй нь илт байсан тул Дуань Юйшуань үүнийг тэвчиж чадсангүй.
—Чи намайг харааж байна уу? гэж Чү Фэн тайван асуулаа.
—Тийм бол яах юм? Чи чинь ямар асуудалтай юм бэ? Энэ газар танай гэр бүлийнх гэж бодож байна уу? Миний харж байгаагаар, чи ингэж даалгаврын пайз булааж байгаа нь энд гай тарихаар ирсэн хэрэг л байна…
Дуань Юйшуань үгээ гүйцээж амжаагүй байтал,
Тас!
Чү Фэн түүний нүүрийг тасхийтэл алгадлаа.
Алгадалтын хүч Дуань Юйшуанийг хоромхон зуур агаарт хөвөх мэт болгож, бүх бие нь нисэн одов. Тэр газарт унахдаа амаа ангайхад амнаас нь гурван шүд унаж гарч ирэв.
Шуугиан дэгдэв.
Учир нь саяхан л гаднаас харахад онц гойд биш байсан тэр залуу Сүнсний шатны 6-р түвшний хүчтэн болохыг бүгд мэдэрсэн юм. Түүнээс цацрах аура нь ч туйлын өтгөн байлаа. Энэ бүхэн олныг хэлэх үггүй болгожээ.
Сүнсний шатны 6-р түвшин. Хэдийгээр тэр дотоод хүрээний хамгийн хүчтэй нь биш ч ийм насандаа 6-р түвшинд хүрсэн нь аль хэдийн олныг цочирдуулахуйц зүйл байв.
Далавчит Эвслийн Луу, Бар ах дүүс мөн Сүнсний шатны 6-р түвшинд байсан. Гэвч тэдний өмнө байсан энэ залуу тэр ах дүүсээс илт хүчтэй байлаа.
Чү Фэн цочирсон олны харцыг үл тоон, нэлээд олон даалгаврын пайзыг мөрөндөө үүрсэн уутандаа хийв. Дараа нь газар хэвтэж байсан Дуань Юйшуань руу заагаад,
—Дараагийн удаа үг хэлэхдээ анхаар. Би хэдэн даалгавар авах нь чамтай ямар ч хамаагүй, гэв.
Ингэж хэлээд Чү Фэн дэгжин алхсаар явж одов.
Одоогийн хүч чадлаараа Сүнсний шатны 7-р түвшний хүмүүс түүнд өрсөлдөгч болох ч хэмжээнд хүрэхгүй байв. Харин Сүнсний шатны 8-р түвшний хүмүүстэй тулгарсан ч бүх хүчээ дайчилбал тэдэнтэй тулалдаж чадна.
Түүний мэдсэнээр, бүхэл дотоод хүрээний хамгийн хүчтэй хүмүүс Сүнсний шатны 8-р түвшнийх бололтой байлаа. Тийм түвшний хүмүүс арав хүрэхгүй байв. Тиймээс дотоод хүрээнд түүнд айдас төрүүлэх хүн олон байсангүй.
Түүнчлэн Су Мэйтэй харилцсанаас хойш өөрийнх нь онцгой биеийн улмаас бясалгалын авьяас нь бусдад сэжигтэй санагдах вий гэж Чү Фэн санаа зовохоо больсон байлаа.
Эцсийн эцэст дотоод хүрээнд Су Мэй шиг суут нэгэн аль хэдийн байсан. Хөх Лууны Сургуульд, Хөх Мужид, тэр байтугай бүхэл бүтэн Есөн Муж даяар түүнээс ч илүү гайхалтай суутнууд тоо томшгүй олон байв. Тиймээс Чү Фэний одоо үзүүлж буй төрөлхийн авьяас нь сэжиг төрүүлэхээр зүйл биш байлаа.
Иймээс Чү Фэн хүчээ цаашид нуух шаардлагагүй гэж бодов. Ядаж л бусдын өмнө толгой гудайлгахгүй байлаа.
Чү овгийн цугларалтад болсон явдлыг туулсныхаа дараа Чү Фэн нэг зарчмыг бас ойлгожээ. Хүч чадалтай байж л хүмүүс түүнийг хүндэлнэ. Тиймээс тэр цагаас хойш өөрийг нь үл хүндэлсэн хүмүүстэй харьцахдаа өчүүхэн ч биеэ барихгүй байхаар болов.
—Энэ чинь хэн юм бэ? Саяын цацруулсан дарамт нь үнэхээр аймшигтай байлаа. Би өмнө нь түүний тухай сонсож байгаагүй юм байна.
Хүмүүс Чү Фэний холдон одох нурууг харан ярилцаж эхлэв.
—Би түүнийг хэн болохыг мэднэ. Тэр бол Чү Фэн. Бас Далавчит Эвслийн урилгыг татгалзсан хүн.
Тэгтэл хэн нэгэн үүнийг чангаар хашхирлаа. Энэ үгийг сонсоод олны дунд дахин гайхсан уулга алдалт гарлаа.
Харин шалан дээр хэвтэж байсан Дуань Юйшуаний айдас арилаагүй байв. Сүнсний шатны 6-р түвшинд хүрсэн, дээр нь Далавчит Эвслийн дэмжлэгтэй хүнийг тэр өдөж болохгүй байлаа.