Энэ ертөнцөд тоо томшгүй олон мэргэжил байдгийн нэг нь амт шинжээч.
Ийм хүмүүс ихэвчлэн төрөлхийн нарийн амтлах мэдрэмжтэй бөгөөд хоол, орцны амтыг ялгах чадвар нь энгийн хүнийхээс хавьгүй өндөр байдаг.
Бясалгалын түвшин нь заавал өндөр байх албагүй. Гэхдээ зарим дэн буудал, зоогийн газар хоолны амт болон орцны нөлөөг шалгуулахын тулд тэднийг өндөр хөлсөөр ажиллуулдаг.
Гэвч энэ мэргэжлийн байр суурь тийм ч өндөр биш. Доод Есөн Замын нэгэнд л тооцогдоно.
Ертөнцөд хэдэн мянгаар тоологдох мэргэжил бий. Тэдгээрийг ялгаж ангилахын тулд Дээд Есөн Зам, Дунд Есөн Зам, Доод Есөн Зам гэж гурав хуваадаг.
Алхимич, дархан, бүрдлийн мастер зэрэг тулааны техник болон бясалгалд шууд тус болдог мэргэжлүүд Дээд Есөн Замын үндсэн мэргэжилд орно. Харин амт шинжээч бол тулаанчийн гол замаас хазайсан мэргэжил тул Доод Есөн Замд багтдаг.
Шэнь Би Жугийн бодлоор хоол, дарсны өө сэвийг нэг бүрчлэн зааж чадсан Жан Сюань амт шинжээч л байж таарна.
— Тэгж ойлгож болно! — гэж Жан Сюань тайлбар нэмсэнгүй.
Тэнгэрийн Нууц Номын Сан зөвхөн хүний бясалгалын мэдээллийг гаргадаггүй. Жан Сюань ямар нэг хоол амсаж үзмэгц түүний өө сэв номын санд бүртгэгдэнэ. Тийм чадвартай хүнд Ү Чоу шиг нэг эрхлэгчийн арга заль юу байх вэ.
— Өнөөдөр тусалсанд баярлалаа... — гэж Шэнь Би Жу түүнийг зөвшөөрснийг хараад талархав.
Хэрэв энэ залуу хоол, амтыг ингэж ялгаж чаддаггүй байсан бол өнөөдөр тэр үнэхээр хүнд байдалд орох байлаа.
— Юу ч биш! — Жан Сюань гараа хайхрамжгүй хөдөлгөв.
— Саяын асуудлыг чи шийдчихсэн болохоор энэ удаагийн хоолыг миний дайллага гэж тооцох аргагүй боллоо. Дараагийн удаа би чамайг дахиж дайлъя! — гэж Шэнь Би Жу хэлэв.
— Дахиад дайлна аа? — Жан Сюань хэсэг бодсоноо толгой сэгсрэв. — Хэрэггүй дээ. Би амь насандаа хайртай!
Үзэсгэлэнтэй бүсгүйтэй хооллох таатай байж болох ч Жан Сюань өөрийнхөө нэр хүндийг сайн мэднэ. Шэнь Би Жу үнэндээ өөртэй нь хооллох дургүй мөртлөө зүгээр л ёс болгож ингэж хэлсэн ч юм билүү.
Тэгээд ч бүсгүйтэй хамт явах болгонд бусдын атаархлыг дагуулна. Дараа нь араас нь хөөцөлддөг нөхдүүдийг нь яах вэ гэж бас арга сэдэх хэрэг гарна. Одоогоор Жан Сюаньд хийх зүйл олон. Ийм юманд үрэх зав түүнд алга.
— Чи...
Сая л энэ хүнтэй хүн шиг ярьж болох нь гэж бодтол дахиад ийм үг сонссон Шэнь Би Жугийн цээж давчдаж, уур нь ахин оргилов.
Хэчнээн хүн түүнийг хоолонд уриад татгалзсан гэж санана. Харин одоо өөрөө түрүүлж урьтал яг л зөрүүд хөгшнийг гуйгаад байгаа мэт санагдана.
Үнэхээр дургүй хүрмээр!
— За тэгвэл, хоолоо ч идчихлээ. Өөр юмгүй бол би явъя. Надад хийх ажил их байна! — гэж Жан Сюань түүний уурласныг огт анзааралгүй гараа дохиж, явахаар эргэлээ.
— Хүлээ! Би ярьж дуусаагүй байна!
Шэнь Би Жу уураа дарж, амьсгалаа тогтворжуулаад түүн рүү харав.
— Өнөөдөр чи намайг эвгүй байдлаас гаргалаа. Амт шинжээчийн чадвар чинь үнэхээр их тус болсон. Гэхдээ... эцсийн эцэст энэ бол тулаанчийн үндсэн зам биш. Тулаанч хүн бясалгалдаа гол анхаарлаа хандуулах ёстой...
Тулаанч тодорхой түвшинд хүрэхээрээ хоол идэхгүйгээр ч амьд байж чадна. Тиймээс амтат хоол тэдэнд төдийлөн хэрэггүй болдог. Амт шинжээчээр одоохондоо мөнгө олж болох ч энэ нь тулаанч хүний явах ёстой жинхэнэ зам биш.
Өнөөдөр хамт явсны дараа Шэнь Би Жу Жан Сюанийг цуурхалд гардаг шигээ хэрэггүй хүн биш гэдгийг ойлгожээ. Магадгүй тэр хоол, амт судлахад хэт их цаг зарцуулсан учраас Багшийн мэргэшлийн шалгалтын дүн нь ийм муу гарсан байж болох юм.
Ингэж бодоод, уур нь хүрсэн хэвээр байсан ч түүнд хэдэн үг зөвлөхгүй байж чадсангүй.
— За! — гэж Жан Сюань түүнийг сайн санаагаар хэлж байгааг ойлгоод толгой дохив.
Түүнийг явахаар эргэтэл араас нь яарсан хөлийн чимээ сонсогдлоо.
— Жан Сюань, өнөөдөр хаашаа зугтахыг чинь харъя! Энэ удаа мултарна гэж бүү мөрөөд!
Өш хонзон дүүрэн дуу хадсаны дараа хоёр хүн, нэг араатан замыг нь хаав.
Шан Бин, Цао Сюн хоёр байлаа.
Хоёулынх нь нүүрэн дээр том гутлын мөр тодоос тод үлдэж, нүүрнийх нь тал хавдаж улайсан бөгөөд амных нь булангаар цус шүүрч байв. Өмнөх цэмцгэр, бардам төрхөөс нь юу ч үлдээгүй.
Ялангуяа Шан Бин бүр өрөвдмөөр харагдана. Өглөөний шарх нь эдгээгүй байхад дээрээс нь дахиад хүчтэй өшиглүүлжээ. Ам нь нэг тийш мурийж, уруул нь хоёр бүдүүн хиам шиг хавдсан тул «царайлаг» гэдэг үгнээс бүр ч холджээ.
Уг нь тэр Шэнь Би Жугийн өмнө сүртэй харагдахын тулд бүхнийг төгс төлөвлөсөн. Гэтэл бүтэлгүйтээд зогсохгүй ингэтлээ зодуулж, Хунтянь Асартай байсан холбоогоо ч таслуулчихлаа. Буруугаар эргэвэл өвөөдөө хүртэл загнуулж мэднэ. Ийм доромжлолыг яаж залгиад өнгөрөх вэ?
Бодох тусам уур нь шатаж, Жан Сюань руу шууд давхин иржээ.
— Шан Бин, чи юу хийх гээд байгаа юм? — Шэнь Би Жу түүнийг араас нь ирж хэрэг тарихыг төсөөлөөгүй тул Жан Сюаний өмнө гарч хаав.
— Шэнь багш аа, замаас холдоорой! Энэ бол Жан Сюань бид хоёрын хувийн өш хонзон!
Шэнь Би Жуг хараагүй байсан бол арай гайгүй байх байж. Харин академийн нэртэй «хогийн багш»-ийг өмнөө орж хамгаалж байгааг нь хараад Шан Биний уур бүр дүрэлзэв. Уурласандаа нүд нь гилжийж, ам нь улам мурийлаа.
Атаархал нь ухааныг нь балартуулжээ. Тэр Жан Сюань руу хүйтнээр ширтээд хашхирав.
— Жан Сюань, чи эр хүн мөн үү? Эр хүн юм бол эмэгтэй хүний ард бүү нуугдаад, надтай шударгаар амь тавин тулалд!
Урд нь зогсох нөхөр ухаанаа алдтал уурласныг хараад Жан Сюань нүдээ томруулан,
— Эмэгтэй хүний ард нуугдлаа гээд яасан юм? Энэ ч бас миний чадвар. Чи чаддаг юм бол ард нь нуугдах хүн өөрөө олооч! — гэв.
— Чи...
Шан Бин бараг цусаар бөөлжих шахав.
Эр хүнийг «эмэгтэй хүний ард нуугддаг аймхай» гэж хэлбэл ичсэндээ уурлаж, шууд гарч ирэн тулалдах ёстой биш гэж үү?
Яагаад энэ нөхөрт ердийн хүний логик үйлчилдэггүй юм бэ?
Ийм ичмээр зүйлийг яаж ингэж юу ч болоогүй мэт, бүр зөв юм шиг ярьж чаддаг байна аа?
Хараал ид, хүний нүүр яаж ингэтлээ зузаардаг байна!
— Шэнь багш аа, энэ хоёрыг танд үлдээе. Надад хийх ажил байгаа болохоор түрүүлээд явлаа!
Өөр ертөнцөөс ирсэн Жан Сюань юу эс үзсэн билээ. Ичих нүүргүй гэнэ ээ?
Инээдтэй юм.
Өмнөх амьдралынх нь мэдээллийн эринд... ичих нүүргүй хүн үзээгүй гэж үү?
Өөр хүн сайн дураараа өмнөөс нь асуудал шийдээд өгье гэж байхад Жан Сюань өөрөө оролцох сонирхолгүй байлаа.
Тэр айсандаа ингэж байгаа юм биш. Харин одоохондоо бясалгалынхаа жинхэнэ түвшнийг ил гаргах тохиромжтой үе биш. Дээрээс нь Шан Биний өвөө ахлагч. Хэрэв түүнийг хэт шахаж, асуудлыг томруулбал дараа нь гарах төвөгт Жан Сюань үнэт цагаа үрэх хэрэг гарна. Харин одоо өөрийг нь хамгаалах хүн байхад хүч гаргалгүй өнгөрөхөд юу нь буруу байх вэ.
— ...
Энэ залуугийн ичих нүүргүй байдлыг хараад Шэнь Би Жу хүртэл хэлэх үггүй болов.
Саяхан л Шан Биний доромж үгэнд өдөөгдөж, тулалдахаар гарч ирчих вий гэж санаа зовж байжээ. Одоо бодоход дэмий л айж.
Энэ нөхрийг үгээр өдөөн гаргаж чаддаг юм бол гахай хүртэл модонд авирна!
— Жан Сюань, зогс! Өнөөдөр чамайг алж чадахгүй бол би Шан Бин гэдэг нэрээ хаяна!
Жан Сюаний энэ хандлагыг хараад Шан Бин улам галзуурч, чамархайн судас нь товойн царай нь ногоорлоо. Шэнь Би Жу зам тавих санаагүйг хараад тэр архирав.
— Тэнгэр Бутлагч Арслан, түүнийг ал! Чи үүнийг хийчихвэл би чамд өдөр бүр амттай хоол авчирч өгнө! Бас өвөөгийн надад өгөхөөр амласан «Хийн Цэг Суллах Үрэл»-ийг ч чамд өгье!
Тэнгэр Бутлагч Арслан бол хүний гаршинд орсон 6-р зэрэглэлийн зэрлэг араатан. Хүний үгийг ойлгох чадвартай.
Шан Биний өвөөгийн тэжээвэр араатан учраас эзнийх нь ач хүү аюулд өртөөгүй цагт түүний тушаалыг тоох шаардлагагүй. Тиймээс Шан Бин түүнийг хөдөлгөхийн тулд тэр дороо элдэв ашиг амлав.
— Аррр!
Амлалтыг сонсмогц Тэнгэр Бутлагч Арслангийн нүд гэрэлтэв.
Писюэ буюу Хийн Цэг Нээх шатанд хүрсэн зэрлэг араатан хүн шиг жинхэнэ хийгээ удирдан хийн цэгээ хүчээр нээж чаддаггүй. Бие нь өсөж хөгжихийн хэрээр хүч нь аажмаар нэмэгдэхээс өөр аргагүй. Харин одоо «Хийн Цэг Суллах Үрэл» идэж чадвал эмийн нөлөөгөөр хүч нь гарцаагүй огцом өснө!
«Хийн Цэг Суллах Үрэл» бол Тулаанчийн 6-р данийн мэргэжилтнүүдэд зориулсан үрэл. Хийн цэгүүдийг суллаж, Писюэ шатанд цааш ахихад тусалдаг.
Шан Бин одоо Тулаанчийн 5-р дань — Динли буюу Хүч Тогтоох шатны оргил үед хүрсэн бөгөөд Писюэ шатнаас ганц алхмын зайтай. Тиймээс Шан Чэнь ахлагч асар их үнэ төлж энэ үрлийг олж, ач хүүгийнхээ шат ахилтад туслахаар бэлдсэн байжээ.
Уг нь Шан Бин ийм үнэт үрлээ өгөхийг хүсээгүй. Гэвч өөрийг нь «хог» гэж тооцдог хүн ингэж шившиг болгосныг санах бүрд уураа барьж чадахгүй байлаа.
Өнөөдөр Жан Сюанийг зайлуулж чадахгүй бол академид дахиж нүүр бардам явах аргагүй болно.
Ялангуяа Шэнь Би Жу...
Тэр өөр рүү нь дахиж нэг ч харахгүй биз!
Ийм юмыг яаж тэвчих вэ!
— Шан Бин, чи юу хийх гээд байна? Академийн нутаг дэвсгэрт хамт ажилладаг багшаа алах нь хүнд гэмт хэрэг шүү...
Шан Бин Тэнгэр Бутлагч Арсланг үнэхээр дайруулахаар солиорно гэж Шэнь Би Жу бодсонгүй. Харц нь хурцдан, Жан Сюанийг хамгаалахаар урагшлах гэтэл Шан Бин өөрөө замыг нь хаав. Тэр сандран хашхирав.
Академийн дотор багш нар бие биеэ алахыг хатуу хориглодог. Энэ бол академийн дүрмийг ноцтой зөрчсөн, хүнд хэрэг.
— Жан Сюань намайг алахыг завдсан. Тэнгэр Бутлагч Арслан эзнээ хамгаалахын тулд сөрөн дайрсан. Би зүгээр л өөрийгөө хамгаалсан хэрэг. Үүнд хэн юу гэх юм? — Шан Биний нүд улайж, ухаан нь балартан архирав. — Тэнгэр Бутлагч Арслан, юугаа хүлээгээд байгаа юм? Дайр!
— Чи...
Шэнь Би Жугийн дотор хүйт даав.
Ямар ичгүүргүй хүн бэ!
Хэрэв Шан Бин үнэхээр ийм тайлбар бариад, дээрээс нь Шан Чэнь ахлагч хэрэгт оролцвол мултарч ч мэднэ. Тэр байтугай ямар ч шийтгэлгүй үлдэх боломжтой!
Харин Жан Сюань энд үхэж мэднэ!
Эцсийн эцэст Тэнгэр Бутлагч Арслан бол 6-р зэрэглэлийн зэрлэг араатан. Энгийн Писюэ шатны мэргэжилтэн ч түүний өрсөлдөгч биш. Тэгэхэд Багшийн мэргэшлийн шалгалтад хамгийн сүүлд орсон Жан Сюань яаж тэсэх юм бэ?
— Аррр!
Шэнь Би Жу сандарч амжаагүй байтал Тэнгэр Бутлагч Арслан архиран дайрлаа. Бие нь хүрч ирэхээс өмнө л хүчирхэг сүр нь догшин салхи босгож, эргэн тойрны өвс, модны навчсыг газарт бөхийлгөв.
Тайлбар: «Есөн Зам»-ыг мөн «Гурван Сургааль, Есөн Зам» гэж нэрлэдэг. Энэ нь эртний Хятадад ажил, мэргэжлийг ангилахад хэрэглэж байсан бодит нэр томьёо юм. Тухайн үеийн ойлголтоор мэргэжлүүдийг Дээд Есөн Зам, Дунд Есөн Зам, Доод Есөн Зам гэж ангилдаг бөгөөд зам бүр тодорхой төрлийн ажил, мэргэжлийг илэрхийлнэ. Дээд Есөн Замд хаан, гэгээнтэн, аглагт суугч мэргэн, мэргэч, эрдэмтэн, дайчин, тариачин, ажилчин, худалдаачин гэсэн есөн ангиллыг дээдээс доод нэр хүндийн дарааллаар багтаасан хувилбар бий. Дунд болон Доод Есөн Зам ч өөр өөрийн мэргэжлүүдтэй. Харин «Гурван Сургааль» гэдэг нь Күнзийн сургааль, Даосын сургааль, Буддын шашныг хэлнэ. Есөн Замын ангиллын хэд хэдэн өөр хувилбар байдаг бөгөөд тэдгээрийн олонх нь Буддаг эхэнд нь жагсаадаг.